Фудбалскиот клуб Охрид ги започна подготовките за сезоната 2025/26 во Втората македонска фудбалска лига, влегувајќи во новата сезона со јасна цел – пласман во Првата лига!
Со стартот на подготовките, охриѓани најавија максимална посветеност, висок интензитет на тренинзите и работа исполнета со страст и љубов кон фудбалот. Во наредните недели, тимот ќе одигра неколку контролни натпревари, преку кои стручниот штаб ќе го гради тактичкиот план и ќе го воигрува ростерот за предизвиците што следуваат.
Клубот веќе сериозно работеше на засилување на играчкиот кадар, ангажирајќи ги Леонид Кофиловски, Иван Глигоров, Димитриј Димитриевски, Стојан Попоски, Димитриј Попоски, Андреј Симевски и голманот Дамјан Серафимов, со што јасно ја потврди амбицијата за борба за највисоките позиции на табелата и враќање во македонската фудбалска елита.
Клубот најавува дека оваа сезона ќе биде нивна – со поддршката на верните навивачи, а особено на „Рибарите“, кои се најавени како вистински „12-ти играч“ во битките што претстојат.
Новата сезона во Втората лига започнува на 23 август.
