Од 12 до 14 септември, Берово ќе биде срцето на пинг-понгот во регионот, кога во Спортскиот центар „Македонски Бранители“ ќе се одржи четвртото издание на престижниот меѓународен турнир – „Зегин Опен 2025“.
Турнирот, кој веќе стана традиционален спортски настан во календарот на македонскиот пинг-понг, повторно ќе собере врвни натпреварувачи од земјава и странство, меѓу кои се очекуваат и европски шампиони и олимпијци. Минатата година, специјална ѕвезда беше хрватската олимпијка Ивана Малобавиќ, а годинава се најавуваат уште поголеми имиња.
Организатор на турнирот е ППК Зегин Берово, кој со поддршка од своите партнери и институции вложува максимални напори за настанот да го задржи својот висок рејтинг и да понуди спектакл достоен за Европа.
Наградниот фонд изнесува 18.000 евра, што го прави еден од најатрактивните пинг-понг турнири во регионот!
Настанот е отворен за публика, а љубителите на спортот ќе имаат можност три дена да уживаат во висококвалитетни мечеви, фер-плеј и спортска магија.
Како и минатата година, „Спортска Мрежа“ ќе биде медиумски партнер на турнирот, со најави, видеа и интервјуа од местото на настанот. За сите што сакаат да се потсетат – епизодата од „Зегин Опен 2024“ веќе е достапна на нашиот YouTube-канал.
