Бобан Георгиев повеќе не е дел од редовите на Арсими, но неговото име засекогаш ќе остане запишано во историјата на клубот од Чегране, кој оваа сезона избори историски пласман во Првата македонска фудбалска лига.
Георгиев беше еден од најзаслужните играчи за овој успех, откако се приклучи на Арсими во зимскиот преоден рок и одигра блескава пролетна полусезона. Во текот на своите шест месеци во клубот, тој постигна неколку клучни голови и запиша значајни асистенции, со што го водеше тимот кон второлигашкиот врв и остварување на најголемата цел – промоција во елитата.
Со своето искуство и зрелост на теренот, Георгиев беше лидер на теренот, а неговиот придонес не помина незабележано. Според информации на Спортска Мрежа, тој веќе има неколку понуди од странски клубови и наскоро се очекува да ја донесе одлуката за следната дестинација.
28-годишниот офанзивец во својата кариера настапуваше за Металург, Брегалница, Силекс, Воска Спорт и Пелистер, како и за странски клубови од Србија и БиХ – Радник, Борац Бања Лука и Леотар. Арсими останува со историски успех и ќе дебитира во Првата лига, додека Георгиев е подготвен за нов меѓународен предизвик.
