Македонскиот футсал шампион Форца од Куманово наскоро ќе ги стартува подготовките за новата натпреварувачка сезона, која ќе биде исполнета со амбиции – како на домашната сцена, така и во елитното европско натпреварување, односно квалификациите во футсал Лига на шампиони на УЕФА.
Според најавите од клубот, почетокот на тренинзите е блиску, а фокусот е насочен кон изградба на квалитетен и обединет колектив, подготвен да одговори на сите предизвици што претстојат. Форца ќе се стреми кон повторување и надминување на претходниот успех, задржувајќи го јадрото од актуелните играчи кои беа клучна фигура во освоената двојна круна.
Во наредниот период, се очекуваат официјални соопштенија од клубот во врска со продолжување на договорите од сегшниот ростер, со цел одржување на стабилност и континуитет во тимот.
Покрај домашниот кадар, Форца е во напредна фаза на преговори со странски засилувања, играчи со сериозно меѓународно искуство кои доаѓаат од земји со силна футсал традиција. Овие имиња треба да донесат дополнителен квалитет, интензитет и лидерство – и ќе бидат дел од долгорочната стратегија на клубот.
Клубот веќе се подготвува за организацијата на Лигата на шампиони во Куманово, што претставува голем спортски и логистички предизвик, но и уште една потврда за сериозноста на Форца.
