Македонскиот ракометен шампион Еурофарм Пелистер и досегашниот шеф на стручниот штаб Раул Алонсо спогодбено ја прекинаа соработката.
Од клубот информираат дека до разделбата дошло на барање на шпанскиот стратег, кој поради приватни причини ќе се врати во Германија.
Од Битолскиот клуб му се заблагодарија на Алонсо за неговата работа и му посакаа многу успех во понатамошната кариера.
Алонсо го водеше Еурофарм Пелистер до нова шампионска титула во македонската Суперлига, откако во драматично последно коло го совладаа најголемиот ривал Вардар на гостински терен во Скопје.
Тоа беше и клучниот триумф кој го донесе пехарот во Битола и стави печат на успешната сезона под водство на искусниот шпански тренер.
Клубот во следниот период ќе го објави името на наследникот кој ќе го води тимот во новата сезона во Суперлигата и во настапите во Лигата на шампионите.
