На „Железарница“ во Автокоманда ќе се соочат некогашните прволигаши Скопје и Брегалница, во рамки на 6. коло од Втората македонска фудбалска лига. Брегалница е лидер на табелата од можни 15 има 13 бодови на своето конто и сезоната сака да ја заврши на првите две места кои директно водат кон Првата лига со тоа „сините“ од Штип ќе имаат експресен камбек, во однос на Скопје кој сезонава ќе конкурира само за висок пласман.
Сепак гостувањата во Автокоманда секогаш важеле за тешки, неизвесни и таму тешко се освојуваат трите бодови, бидејќи „пиратите“ на домашен терен се повеќе од незгоден противник.
Брегалница со трите бодови ќе остане на врвот од табелата, а во зависност од резултатите на конкурентите може и да одлепи на повеќе бодови залиха, а пак Скопје денес против лидерот ќе го бара само вториот сезонски триумф.
Во однос на меѓусебните соочувања, двете екипи од 2010 година наваму за првпат ќе се соочат меѓусебно како второлигаши, досега меѓусебно играле во Првата лига девет пати и еднаш на пријателски меч. Брегалница е многу подобра во меѓусебните дуели дури четири пати била победник, Скопје само еднаш ја добил Брегалница, а пак четири натпревари завршиле без победник.
Натпреварот меѓу Скопје и Брегалница, од 6. коло на Втората лига се игра денес на „Железарница“ во Автокоманда од 14 часот.
