Најтрофејниот македонски фудбалски клуб, Вардар, активно го оформува тимот за претстојната сезона и веќе ги договори првите нови засилувања. Станува збор за двајца странски фудбалери, од кои едниот доаѓа од домашната Прва лига, додека другиот пристигнува од Франција.
Првото засилување за новата сезона е Нигериецот Ибрахим Олаосебикан, кој минатата сезона беше дел од екипата на Брера Струмица. Станува збор за 25-годишен офанзивен играч кој се истакна со својата разновидност во средниот ред. Во текот на сезоната 2024/25, тој одигра вкупно 28 натпревари во Првата македонска фудбалска лига, на кои постигна 2 погодоци и оствари 4 асистенции.
Пред да пристигне во Македонија, тој играше за два реномирани литвански клубови – Судува и Хегелман, а својата професионална кариера ја започна во родната Нигерија, настапувајќи за тимот Реал Сафир.
Покрај него, Вардар договори и ново засилување од Франција. Станува збор за фудбалер кој бил дел од младинските категории и сениорскиот тим на францускиот прволигаш Мец, клуб со богата историја и традиција. Иако неговото име засега не е објавено, од клубот најавуваат дека официјалната промоција ќе се случи во текот на наредните денови.
