По повеќе од една деценија мината во дресот на Динамо Загреб, македонскиот репрезентативец Аријан Адеми и хрватскиот шампион се разделија спогодбено. Триесет и четири годишниот играч за врска , кој беше срцето на тимот и долгогодишен капитен, го напушта „Максимир“ и се сели во Унгарија, каде што ќе настапува за Ујпешт.
Новата средина не е случајна затоа што клубот каде што ќе игра го предводи Дамир Крзнар, тренер кој добро го познава Адеми од периодот во Динамо. И покрај тоа што имаше понуди од клубови од регионот и од Блискиот Исток, Адеми реши да остане во Европа и ја избра унгарската лига како завршна станица на својата импресивна кариера.
Адеми фудбалскиот пат го започна во Шибеник, а во 2010 година се пресели во Динамо. По кратка позајмица во Локомотива, се врати и стана еден од најважните играчи на „модрите“, со кои освои многу трофеи и запиша над 350 настапи.
Неговото име ќе остане врежано во историјата на загрепскиот клуб како симбол на верност, пожртвуваност и лидерство. Тој е најодликуван играч во историјата на клубот со 24 освоени трофеи, вклучувајќи 13 шампионски титули, 7 купа и 4 суперкупа.
