Струга Трим Лум официјално го назначи Бледи Шкемби за нов шеф на стручниот штаб, кој на оваа позиција го наследува Илчо Ѓорѓиоски.
По богата играчка кариера и значително искуство како тренер, Шкемби доби доверба од клубот да го води првиот тим во новата сезона. Тој е еден од најпознатите имиња во албанскиот фудбал, а во своето досегашно тренерско портфолио ги има два ангажмани на клупата на елитниот албански клуб Тирана.
По разделбата со „бело-сините“ од албанската престолнина, Шкемби се приклучува на Струга ТЛ со јасна визија – да изгради стабилен и конкурентен тим кој ќе игра значајна улога во македонскиот фудбал во следните години. Договорот е потпишан на две години, со можност за продолжување на уште една сезона.
Во стручниот штаб на Шкемби ќе се приклучи и Сабиен Лилај, уште едно име во албанскиот фудбал и поранешен фудбалер на славниот Скендербег. Лилај ќе ја извршува функцијата на прв помошник.
Останатиот дел од тренерскиот тим останува речиси непроменет – Меритон Гега и Дејан Лескароски ќе продолжат со своите улоги како помошници, Стефан Мечкаровски ќе биде задолжен за физичката подготовка, додека Дардан Мифтари останува тренер на голманите.
Бледи Шкемби остави длабока трага како играч на Скендербег, каде што беше дел од златната генерација која освои шест шампионски титули и се истакна и на европската сцена, со настапи и победи во групната фаза од Лигата на Европа.
