Одбојкарската сезона 2025/26 носи историски момент за македонскиот клупски спорт. Дури пет македонски клуба ќе се појават на европската сцена, со што одбојката во земјава бележи сериозен исчекор во своето развојно патување.
Шампионот кај мажите, Струмица 47&72, заедно со освојувачот на националниот Куп, Штип УГД, ќе ја претставуваат машката конкуренција. Во женска категорија, трите најуспешни екипи – Јанта Волеј КВ (шампион), Наковски Волеј (освојувач на Купот) и Работнички Скопје (финалист во плејофот) се веќе пријавени за учество во европските клупски натпреварувања под покровителство на ЦЕВ.
Особено е значајно што три клуба – Штип УГД, Јанта Волеј КВ и Наковски Волеј – дебитираат во ЦЕВ куповите, што само го потврдува растот и амбициите на македонската одбојка.
Струмица 47&72 и Јанта Волеј КВ, како актуелни шампиони, ќе се борат во ЦЕВ Лигата на шампионите, најпрестижното клупско натпреварување. Во Челинџ купот, ќе се натпреваруваат Штип УГД и Наковски Волеј, додека Работнички Скопје аплицираше за вајлд-карта и очекува одобрение за учество во третото по ранг ЦЕВ натпреварување.
Ждрепката за сите три европски купа ќе се одржи на 15 јули во Луксембург, каде клубовите ќе ги дознаат своите први европски ривали.
Овој потег претставува огромна можност не само за натпреварувачки предизвик, туку и за поголема промоција на македонската одбојка надвор од границите, нови искуства и силен поттик за младите генерации кои сонуваат за големи сцени.
