Фудбалскиот клуб Пелистер од Битола влегува во нова фаза на своето функционирање. Денес, клубот одржа собрание на акционери на кое беа прифатени оставките на досегашните членови на раководството – Митко Стојковски, Тони Мицевски, Пеце Цветковски и Златко Деловски. Од клубот упатија искрена благодарност за нивниот придонес и професионален однос во изминатиот период.
Општина Битола, како единствен акционер во клубот, ја презема клучната улога во поставување на новата управна структура. За генерален извршен директор е именуван Александар Стефановски, кадар од општинското одделение за јавни дејности и човек со досегашно активно учество во спортот при општина Битола.
„Ми причинува голема чест и одговорност што ми е доверен овој нов почеток на клубот. Во наредниот период ќе го претставиме новиот тренер, кој ќе добие пошироки ингеренции во делот на спортската стратегија. Веруваме дека ФК Пелистер АД е на вистински пат и ќе продолжиме со стабилен развој“, изјави Стефановски за клубската страна.
Покрај Стефановски, Сашо Здравевски останува на функцијата технички директор, додека нов координатор на младинската школа ќе биде искусниот фудбалски стручњак Марјан Секуловски, кој веќе има значајна историја во развојот на млади играчи.
Оваа реконструкција доаѓа во момент кога клубот се подготвува за предизвиците на новата сезона, и е дел од стратегија за стабилизација, професионализација и долгорочен раст. Со новиот раководен тим, ФК Пелистер ќе се обиде повторно да стане препознатлив бренд во македонскиот фудбал, со посебен фокус и на развојот на младите категории.
Битола се надева дека ова ќе биде пресвртница кон посветла иднина за својата фудбалска гордост.
