Македонскиот второлигаш ФК Беласица од Струмица испрати силна порака за своите амбиции во сезоната 2025/26, задржувајќи го еден од своите највредни фудбалери – Александар Коцев. Овој потег е јасен сигнал дека клубот има високи цели, а примарна меѓу нив е враќањето во Првата македонска фудбалска лига.
Коцев, кој иако има само 23 години, веќе има одиграно над 100 натпревари во дресот на Беласица, каде се етаблира како еден од најдобрите играчи во Втората лига. Офанзивецот со исклучителна визија, техника и борбен дух, е симбол на континуитет и верност кон клубот, и токму такви играчи се клучни за реализација на целта на „сините“ – камбек во елитата.
Стартот на подготовките е закажан за 2 јули, кога под водство на тренерот Александар Стојанов ќе започне создавањето на тимот кој ќе се бори за висок пласман. Стојанов веќе најави создавање на урамнотежена екипа составена од млади и перспективни фудбалери, надополнети со неколку искусни имиња кои ќе внесат стабилност и зрелост.
Според информации на Спортска Мрежа, клубот веќе е во преговори со неколку квалитетни засилувања, а подготвителниот период ќе вклучи серија на пријателски натпревари со цел темпирање на формата за стартот на новата сезона.
Беласица изминатата сезона ја заврши на 8. позиција на табелата на ВМФЛ со 41 освоен бод, но со задржувањето на лидерот на теренот – Коцев, и со новите планови за зацврстување на ростерот, тимот од Струмица јасно покажува дека во сезоната 2025/26 нема да се задоволи со средина на табелата. Целта е – промоција меѓу најдобрите!
Беласица оди чекор по чекор, но со срце и визија која се враќа на највисоко ниво.
