Фудбалската школа „Ултрас Кидс“ од Струга, иако постои само неколку години, веќе остави сериозен белег на детската фудбалска сцена во Македонија. Основана со почетокот на изградбата на спортскиот објект „Балон Ултрас“, оваа школа претставува симбол на посветеност, визија и љубов кон фудбалот и децата.
Идејата за создавање на школа се родила како резултат на ентузијазмот на Петар Џигероски – сегашен координатор на младинската школа при ФК Струга, и Марјан Ќушкоски – сопственик на објектот. Денес, „Ултрас Кидс“ брои над 120 деца, од различни возрасти и националности, поделени по генерации од 2014 до 2019 година.
- Тренерскиот кадар е стабилен и посветен:
Петар Џигероски – раководител на школата и координатор на младинската школа на ФК Струга.
Танас Калајџиески – активен од 2021 година, го води тимот од генерација 2016.
Фламур Таири – дел од тимот од 2023 година, предводи неколку категории.
Тренинзите се одвиваат во затворениот современ објект „Балон Ултрас“ – место кое нуди извонредни услови за развој на деца до 10/11 години. Школата е формално регистрирана во 2022 година, а од тогаш редовно учествува на домашни и меѓународни турнири, со бројни признанија и пехари како доказ за квалитетот на работата.
- Најзначајни успеси:
Освоен „Фер Плеј Куп 2025“
3. место на „Некст Левел Куп 2025“
Полуфинале во завршница на детска лига 2024
Полуфинале на „Чин Чин Куп“ – Златибор 2015
Два пати учество на: „Ас Јунајтед Куп“ – Струга, „Фер Плеј Куп“ и „Некст Левел Куп“
Учество на „Балкан Брадерс Чилдрен Куп“
Две сезони настап во Детска лига – Југозападен регион
Особено се истакнува генерацијата 2016, под водство на Танас Калајџиески – кого во школата со почит го нарекуваат „Струшкиот Ханси Флик“, заради неговите неверојатни 9 од 9 финалиња со оваа генерација. Ретки се школите кои за толку кратко време постигнале толкави резултати на национално и регионално ниво.
- Планови за иднина:
Во „Ултрас Кидс“ се размислува и за следниот чекор во развојот на младите фудбалери. Децата кои ги надминуваат возрасните граници на школата, преминуваат под „чадорот“ на ФК Струга, во рамки на младинските категории кои настапуваат во Суперлигата на ФФМ. Притоа, и тренерите од „Ултрас Кидс“ се вклучени во континуитет во тие структури, што создава идеален систем за развој на фудбалери од најмала до сениорска возраст.
