Женската сениорска репрезентација на Македонија изминатиот викенд го заврши вториот настап во ЦЕВ Европската Сребрена лига 2025. По комплетирањето на турнирската фаза македонските одбојкарки имаат две победи и четири порази и се на седмата позиција, со ист број на бодови како и шестопласираниот Исланд.
Ваквата позиција на табелата е сериозен чекор напред на женскиот национален тим, но уште поголемо задоволство носи и фактот дека селекцијата која ја предводи селекторот Стефан Пауновиќ по тригодишна работа почнува да дава резултати. По скоро два месеци напорна работа и девојките и стручниот штаб се на заслужен одмор, а откако емоциите се смирија и се сумираа впечатоците, стигнува и анализата.
„Задоволен сум од начинот на кој репрезентацијата одговори на предизвиците во овој циклус. Во Сребрената лига остваривме две важни победи и одигравме два исклучително квалитетни натпревари против Израел и Грузија во кои покажавме борбеност, карактер и тактичка зрелост. Навистина сум горд на екипата за онаа победа над Луксембург со која испишавме историски резултат – прва официјална победа по 17 години на женската сениорска репрезентација. Тоа е повеќе од спортски успех, тоа е симбол дека работите се менуваат и дека нашата работа има подлабока смисла. Градиме систем кој ќе трае. Од 2022 година работиме темелно на поставување на идентитетот на оваа екипа, играта и културата. Екипата е млада, но исклучително талентирана и покажа дека има срце и визија. Овој циклус е доказ дека репрезентацијата е на вистинскиот пат“, вели селекторот Пауновиќ и додава:
„Посебно сакам да истакнам дека видлив е менталниот напредок кај девојките, кои и во поразите останаа фокусирани и веруваа една на друга. Сметам дека имаме вистински темели за она што не очекува во иднина. Сега останува малку да здивнеме пред повторно да се собереме во пресрет на евро-квалификациските дуели со Австрија и Грција.“
Сениорките имаат пауза до 20 јули за кога е закажан собирот на репрезентацијата во Маврово, кога ќе стартуваат подготовките за квалификациските дуели со Австрија и Грција за ЕП 2026.
