Европската ракометна федерација (ЕХФ) ја донесе конечната одлука по инцидентот на реванш-финалето од ЕХФ Европскиот куп меѓу Алкалоид и АЕК Атина. Македонскиот клуб е казнет со 5.000 евра поради необезбедување доволно билети за гостинските навивачи на натпреварот во салата „Борис Трајковски“, што беше причина АЕК да одбие да настапи.
Голем број навивачи на АЕК пристигнаа во Скопје, но откако не им беше дозволен влез во салата, раководството на грчкиот клуб донесе одлука играчите да не го започнат мечот.
ЕХФ го регистрира натпреварот со службен резултат 10:0 за Алкалоид и му ја додели титулата за шампиони во Европскиот куп за сезоната 2024/25.
Најголеми последици сепак трпи АЕК – казнет е со 20.000 евра за неиграње на натпреварот и суспендиран е две години од сите меѓународни натпреварувања кои се под организација на ЕХФ.
