Македонскиот ракометен прволигаш Охрид продолжува со формирањето конкурентен состав за новата сезона и го официјализираше трансферот на искусниот голман Бојан Блажески.
28-годишниот Блажески стави потпис на договор со „гладијаторите“ во траење од најмалку две години и ќе биде дел од македонското трио на голманската позиција, кое веќе се создава во таборот на охриѓани.
Блажески доаѓа од екипата на Бутел Скопје, каде што настапуваше цели осум сезони и стекна значајно европско искуство, со три учества во натпреварите од Европските купови. Исто така, во својата кариера беше дел и од кадетската и младинската репрезентација на Македонија.
Во новиот клуб, Блажески ќе го носи дресот со број 30 и ќе има важна улога во амбициозниот проект на ГРК Охрид за претстојната натпреварувачка сезона, a во која Охрид обезбеди излез во Европа, откако сезоната ја заврши на четвртото место во плеј-офот.
Клубот ја продолжува изградбата на квалитетен ростер, со цел да биде уште поконкурентен на домашната и меѓународната сцена.
