Фудбалската федерација на Македонија потврди дека двајца македонски претставници ќе учествуваат на Европското првенство до 21 година, кое се одржува од 9 до 28 јуни во Словачка.
Филип Поповски ќе делува како делегат на УЕФА и ќе биде задолжен за натпреварите на стадионот во Трнава. Неговата улога вклучува надгледување на организацискиот дел од натпреварите, проверка на условите и спроведување на прописите. Поповски веќе има богато меѓународно искуство, а минатата година беше и првиот Македонец кој делуваше како делегат на финален натпревар на Европско првенство, во дуелот меѓу Шпанија и Англија.
„Ова е признание не само за мене, туку и за македонскиот фудбал. Ангажманот доаѓа после години работа на домашни и меѓународни натпревари. Го користам моментот да ја искажам благодарноста до ФФМ и УЕФА за довербата. Наша цел е да покажеме дека имаме капацитети за уште поголеми задачи“, изјави Поповски.
Дополнително, Игор Стојчевски ќе биде дел од судиската екипа на првенството, каде што ќе извршува должност на четврти судија. Овој ангажман претставува уште едно признание од УЕФА за неговата посветеност и континуиран развој на меѓународната фудбалска сцена.
Виолета Јанчева, Спортска Мрежа
