Охрид убедливо го декласираше Тиквеш со 32:23 и ја оправда фаворитската улога во последниот меч за сезона 2024/2025, победа која значи обезбедена „виза“ со која охриѓани ќе играат во Европа следната сезона.
Стевче Алушовски за последен пат го водеше Охрид како тренер и со победа се збогуваше од охридската публика во СРЦ „Билјанини Извори“.
Од самиот почеток Охрид најави дека нема да му дозволи на гостинот од Кавадарци воопшто да има било каква надеж за изненадување и така беше во текот на целиот меч.
Кај Охрид најдобар беше Цирар со шест гола, а пак Ојлески имаше пет гола, кај Тиквеш со по четири гола најдобри беа Обина и Анастасовски.
Охрид заврши на четвртото место и со тоа ќе се подготвува за Европските Купови.
Како што претходно информираше Спортска Мрежа, клубот покрај разделбата со тренерот Алушовски, се раздели и со неколку играчи односно Бобан Ристевски, Милорад Кукоски, Никола Јукиќ, Живан Пешиќ, Хироки Матсуока, Горан Крстевски и Циао Винициус, а пак Крсте Андоновски кој ја заврши кариера ќе биде дел од стручниот штаб од следната сезона.
Како што информираа од Охрид, направиле напори да го задржат Петар Николоски, но тој го одбил клубот и ќе ја продолжи кариерата во друга средина.
Шампион на Македонија е Еурофарм Пелистер, Вардар е вицешампион, Алкалоид заврши на третото место, Охрид на четвртата позиција. Екипата на Тиквеш сезоната ја заврши на петтото место, а пак Бутел беше шести односно последен во плеј-офот.
