Некогашниот капитен и долгогодишен ракометар на Охрид, Крсте Андоновски ја заврши професионалната кариера, вечерва во СРЦ „Билјанини Извори“ го одигра неговиот последен натпревар, а кој заврши со огромен триумф за Охрид над Тиквеш, со што охриѓани се чекираа во Европа.
Андоновски со многу емоции даде изјава за Спортска Мрежа, вели дека одиграле тежок натпревар, со кој ја оствариле првичната цел, да се добие мечот и да се обезбеди излез во Европа.
„Успеавме да извојуваме победа игравме еден тежок натпревар можеби под притисок бидејќи мораше да се добие, но првичната цел ја остваривме. Го освоивме тоа четврто место што значи натпревар во следната сезона во Европските купови. Следната сезона се надевам дека овој тим ќе оди нагоре, ќе оствариме и подобри резултати како во Европскиот Куп така и во домашното првенство“, вели Андоновски за Спортска Мрежа.
Андоновски ја заврши професионалната кариера, за Спортска Мрежа зборуваше со многу емоции, а од следната сезона ќе биде во стручниот штаб на Охрид.
„Овој натпревар беше важен за мене бидејќи беше и последниот, целата кариера ја поминав во овој клуб, дојде време и за крај, но има и нови почетоци од следната сезона сум дел од стручниот штаб и се надевам дека тоа ќе биде едно ново поглавје и дека ќе го работам со успех“, вели Крсте Андоновски во изјава за Спортска Мрежа.
Андоновски доби плакета од страна на клубот за посебен придонес во ГРК Охрид. Клубот сезоната ја заврши на четвртото место во плеј-офот што ќе значи и излез во Европа во следната сезона.
