Женскиот фудбалски клуб Ускана од Кичево во новата сезона 2025/2026 ќе се натпреварува во Втората женска фудбалска лига за првпат.
Како што дознава Спортска Мрежа, ЖФК Ускана се одлучи да пријави учество во сениорска конкуренција, а тоа значи дека Втората женска фудбалска лига добива уште една нова екипа.
Клубот бара поддршка од локалната самоуправа и спонзорите кои ќе придонесат за женскиот спорт во Кичево и регионот.
Клубот кој веќе стекна репутација преку својата работа со младинските категории, особено со кадетките до 15 години, продолжува амбициозно да се развива.
Во редовите на ЖФК Ускана моментално тренираат околу 40 девојки од различни возрасти, кои со голема посветеност и љубов кон фудбалот секојдневно работат на своите вештини и спортскиот развој. Клубот не само што претставува платформа за афирмација на младите спортистки, туку и инспирација за женскиот спорт на локално и национално ниво.
Во новата сезона покрај ЖФК Ускана, нов клуб ќе биде и ЖФК Некст Левел од Охрид, а како што е познато од минатата сезона во лигата ќе се натпреваруваат Вардар кој не го помина баражот за влез во Прва лига, Билјанини Извори, Порече, Плачковица, Победа Валандово, Слободен и Борец.
Според информациите на Спортска Мрежа ќе има уште неколку нови екипи во Втората женска фудбалска лига во сезона 2025/2026.
