Вчера, новоформираниот женски фудбалски клуб Некст Левел во соработка со Црвен Крст – Охрид организираа заедничко дружење и едукација за укажување на прва помош.
Целта на настанот беше едукативна, при што младите фудбалерки имаа можност да научат повеќе за основите на укажување прва помош и за работата на Црвениот крст во Охрид.
Тренерот на ЖФК Некст Левел, Миле Младеновски Илиќ, кој долги години е член на Црвениот крст за спортски организации, за Спортска Мрежа истакна дека неколку девојки од клубот се и волонтерки и најави дека вакви настани ќе се организираат и во иднина. Исто така, тој се заблагодари на тимот на Црвениот крст во Охрид и на претседателот Саша Точков за одличната соработка која ќе продолжи.
Капитенот на ЖФК Некст Левел, Сара Матеска, за Спортска Мрежа нагласи дека ваквите едукативни активности се интересни и поучни, и најави дека ќе се организираат почесто со цел дополнително да се подобри знаењето на фудбалерките.
Како што веќе извести Спортска Мрежа, ЖФК Некст Левел е новоформиран клуб кој веќе се екипира со фудбалерки. Во следниот период ќе бидат промовирани и поискусни фудбалерки, а клубот ќе учествува во новата сезона 2025/2026 во Втората женска фудбалска лига.
