Изминатиот викенд во Крушево се одржа Балканска конференција за биатлон, на која домаќин беше Биатлон федерацијата на Македонија. Настанот обедини делегати од националните биатлон федерации на Хрватска, Босна и Херцеговина, Србија, Грција, Бугарија, Романија, Турција и Либан.
Конференцијата беше збогатена со присуството на значајни имиња од светот на биатлонот, меѓу кои и министерот за спорт на Македонија, Борко Ристовски, претседателот на Интернационалната биатлон унија (ИБУ), Оле Далин, како и членот на Извршниот одбор на ИБУ, Екатерина Дафовска.
Во фокусот на конференцијата беа теми поврзани со меѓусебната соработка меѓу националните федерации, развојни програми, организирање на заеднички тренинг кампови и имплементација на проекти со поддршка од ИБУ.
Дополнително, беше усвоен календарот за летните и зимските натпревари од Балканскиот регионален куп во биатлон за сите возрасни категории.
Претседателот на ИБУ, Оле Далин, ја истакна важноста на овој регион и дава силна поддршка за неговиот понатамошен развој, додека министерот за спорт Борко Ристовски истакна дека развојот на биатлонот ќе биде следен и поддржан преку програмите на Министерството за спорт.
Виолета Јанчева, Спортска Мрежа
