Искусниот турски интернационалец Алпер Потук, член на ФК Гостивар, доби позитивен епилог по жалбата поднесена до арбитражната комисија на Фудбалската федерација на Македонија (ФФМ). Првично, Потук беше суспендиран на две години поради напуштање на теренот на натпреварот против Работнички, но таа одлука е сега укината.
Како што самиот Потук објави преку социјалните мрежи, комисијата ги земала предвид неговите аргументи и донела одлука за повлекување на индивидуалната казна. Овој потег доаѓа по исклучувањето на екипата на Гостивар од Првата македонска фудбалска лига, поради напуштањето на теренот на истиот натпревар, со што клубот беше префрлен во најнискиот ранг на натпреварување.
Потук, кој има богато интернационално искуство зад себе, со оваа одлука ќе може слободно да продолжи со фудбалската кариера, односно сигурно е дека ќе продолжи во друг клуб, со оглед на тоа што Гостивар се сели во Општинска лига или Четврта лига по ранг на натпреварување.
Својата кариера 34-годишниот фудбалер ја започна во Ескишехирспор, потоа настапуваше за Фенербахче, беше дел од Анкарагучу и Чајкур Ризеспор, пред да се пресели во Гостивар.
За турската сениорска репрезентација има одиграно 17 натпревари и постигна еден гол, а ги има поминато младинските репрезентации на Турција.
