Заврши сезоната во Третата македонска фудбалска лига – Исток, откако денес беа одиграни натпреварите од последното 18. коло.
Шампионот Слога Виница денес однесе убедлива победа од 1:5 над Овче Поле во Свети Николе, а домашните играчи со шпалир го поздравија шампионот кој се подготвува за баражот за Втора лига.
Спортски потег за поздравување од страна на фудбалерите на Овче Поле, на клубот од Свети Николе и целата управа.
Уште во првиот дел беа решени сите дилеми околу победникот во Свети Николе. Амар Исљам постигна два брзи вола за 0:2, а во 30. минута Димитар Стојановски постигна гол за 1:2. До крајот на првиот дел Давид Ристов и Игор Ѓорѓиев погодија за 1:4 на полувреме.
Во второто полувреме Филип Петковски постигна гол во 73. минута и ги постави конечните 1:5.
Натпреварот од Свети Николе меѓу Овче Поле и Слога Виница премиерно ќе можете да го следите на youtube каналот на Спортска Мрежа, понеделник од 21 часот.
Дербито во Берово меѓу Малеш и Брегалница од Делчево заврши без победник и без погодоци (0:0).
Главниот судија Александар Ананиев подели два жолти картони кај домашниот тим, а кај гостинот пет жолт и еден црвен картон.
Јован Дојчинов поради два жолти картони во 75. минута беше исклучен од игра, а тоа не го искористи домашниот тим.
Натпреварот во Струмица меѓу Хоризонт Турново и Тиверија заврши без победник (1:1) за поделба на бодовите. Миле Ѓеоргиев постигна гол по само пет минути игра, а во 43. минута од мечот Ѓорги Коцевски ги постави конечните 1:1.
Екипата на Дојранско Езеро забележа убедлива победа од 5:2 над Ударник од Пирава во дербито на Југот. За домашниот тим двојни стрелци беа Глигор Јанкулов и Петар Илиев, а пак Оливер Маринковиќ постигна еден гол. За гостинската екипа двата погодоци ги постигна Крсте Тодоров.
Екипата на Карбинци го доби дербито на домашен терен против Светлост од Зрновци со резултат од 3:2. Со голот на Христијан Крстов во 39. минута домаќинот го отвори резултатот и имаше предност на полувреме од еден гол. На стартот од второто полувреме Стефан Стефановски погоди за 1:1 во 49. минута, но брзо Карбинци преку Саше Соколов дојде до 2:1 и нова предност во 55. минута.
Не требаше многу за Карбинци со вториот гол на Крстов да дојде до предност од 3:1 во 66. минута. Три минути подоцна Саше Соколов заработи директен црвен картон, а пак фудбалерот на Светлост, Славче Митовски доби втор жолт картон и со тоа црвен картон, па така двете екипи до крајот беа со по еден играч помалку на теренот.
Во 78. минута од натпреварот искусниот Влатко Коцев во 78. минута ги постави конечните 3:2.
