Шампионот Преспа со минимални 1:0 го доби тимот на Кравари во рамки на 20. коло на Трета лига – Исток, а единствен стрелец на победничкиот гол во Ресен беше Нико Пластиновски кој погоди во 84. минута од средбата.
Ова беше и единствениот меч на кој имаше само еден гол, на сите останати натпревари беа постигнати голем број на погодоци. Екипата на Сатеска од Волино како домаќин играше во Слатино каде со 6:1 убедливо го декласираше тимот на Славеј од Мешеишта.
Лука Богданоски постигна хет-трик за домашниот состав, а по еден гол постигнаа Даниел Цветаноски, Никола Секулоски и Даниел Митрески, додека пак за гостинската екипа од Мешеишта единствен стрелец беше Стефан Бушиноски кој погоди во 56. минута.
Евротип триумфираше во Дебар каде со 1:3 го совлада Евротип, во меч каде сите четири голови беа постигнати во вториот дел. Владе Јанакиевски погоди за 0:1 во 57. минута, а во 75. миунта Андриан Муладаути постигна гол за 1:1.
По само три минути Христијан Петрески беше прецизен за нова предност на Евротип, а пак Петар Цфетко во 80. минута ги постави конечните 1:3.
Демир Хисар со „петарда“ беше убедлив против тимот на Влазними од Струга, откако на домашен терен беше пресилен со 5:1. Голгетерот Стефан Каревски го отвори резултатот во 25. минута, а пак Јовче Спасески во 31. минута погоди за 1:1.
Во самиот финиш на првиот дел од средбата Трајче Андрески постигна гол и со тоа обезбеди нова предност од 2:1 на полувреме.
Во вториот дел Каревски со втор гол зголеми на 3:1, а конечниот резултатот го поставија Јовче Талевски и Андреј Стефановски.
Во воведниот меч кој се одигра вчера екипата на Караорман која лани испадна од Втората лига на домашен терен во Струга со 3:2 славеше над Велешта преку пресврт.
Гостинот преку Анит Хани погоди во 15. минута за 0:1, а во 30. минута резултатот беше 1:1 со голот на Симеон Миноски. Во вториот дел Миноски со втор гол обезбеди пресврт и водство од 2:1, а потоа Ненад Попоски беше прецизен за 3:1 во 72. минута.
По три минути игра Елмаз Шеи постигна гол и ги постави конечните 3:2 во Струга.
Во рамки на ова коло слободна беше екипата на Света Троица од Охрид.
