Со свечен старт исполнет со ентузијазам, пријателска атмосфера и спортски дух, синоќа официјално започна традиционалниот Турнир во мал фудбал „Враништа 2025“. Настанот кој веќе неколку години го зближува регионот, и оваа година собра 32 екипи од целата околина, подготвени за уште една незаборавна фудбалска авантура.
На првата вечер беа одиграни четири возбудливи натпревари, кои донесоа многу голови и возбудувања. Тимот на Кафе Бар Девет убедливо го совлада составот на Тримерaши со конечни 9:1, при што демонстрираше сигурност и офанзивна доминација.
Со уште поубедлив резултат, Кафе Линди триумфираше над Лавови Струга со 16:2, при што го постави и рекордот по број на постигнати голови во една вечер. Навивачите на трибините уживаа во секој потег на овој расположен состав.
Лабуништа не дозволи изненадување и рутински ја совлада екипата на Саше – Фин со 6:0, покажувајќи дека и оваа година се сериозен кандидат за висок пласман.
Последниот натпревар од вечерта го одбележа победата на Фурна Настоски и Форт Кафе, кои беа подобри од Македонија со 5:1.
Турнирот во Враништа не е само спортски настан, туку и симбол на заедништво, дружење и фер-плеј. Под мотото „Фудбалот е повеќе од игра“, организаторите и оваа година поставуваат високи стандарди, а „Спортска Мрежа“, како долгогодишен медиумски покровител, ќе продолжи да го следи секој момент од овој спортски спектакл.
Следуваат нови возбудувања и нови предизвици – останете со нас за сите резултати, анализи и извештаи од Враништа 2025!
