Екипите на Тиверија Брера, Каменица Саса, Љуботен и Скопје обезбедија пласман во полуфиналето од Купот на Македонија во женска конкуренција.
Тиверија Брера пукна „петарда“ во Битола откако со 0:5 го доби убедливо Атлетико кој имаше сили само за едно полувреме. Во првиот дел од мечот мрежите мируваа (0:0), а во вториот дел гостинот од Струмица постигна пет гола и го реши мечот, а со тоа го завери билетот за полуфинале.
Бразилката Тчеури Харуми Гоја во 63. минута го отвори резултатот за водство од 0:1, а не требаше многу откако Билјана Панеска во 70. минута постигна гол за 0:2. Брзо потоа Мартина Сиљаноска капитулираше по пет пат на својот гол откако во 77. минута Гоја со втор гол обезбеди предност од 0:3.
До крајот на мечот Тиверија Брера постигна уште два гола, откако Теона Галабовска погоди во 86. минута за 0:4, а пак Викторија Недева во 92. минута ја стресе мрежата за конечни 0:5.
Лесна и убедлива победа за Каменица Саса која со 1:5 триумфираше над Ас Јунајтед во Струга. Ана Димитровска беше двоен стрелец за „рударките“, а по еден гол постигнаа Гамарт Михаела, Христина Јовановска и Васка Василева, за стружанки единствен стрелец беше Веса Села која погоди во 69. минута.
Вардар беше единствениот второлигаш кој се најде во четвртфиналето, а против апсолутниот фаворит Љуботен немаше никакви шанси со што тимот од Тетово со 0:8 беше пресилен и обезбеди полуфинале.
Искусната голгетерка Хава Мустафа постигна четири гола, а по еден гол постигнаа Ева Величковска, Мариан Огочукву Охадиве, Елена Симјанова и Ива Јованоска.
Најнеизвесно беше во Прижино каде Скопје со 2:0 го доби Истатов. Мила Панева во 28. минута го отвори резултатот за 1:0, а толку беше и на полувреме. Во вториот дел искусната Рабија Дервиши погоди во 64. минута за конечни 2:0.
