Утре во рамки на 3. коло на плеј-аутот на ракометната Суперлига во СРЦ „25 Мај“ ќе се соочат Радовиш и Струга во директно дерби соочување за опстанок во ракометната елита.
Победата и двата бодови се императив и за двете екипи, притисокот е кај Радовиш кој мора да извлече триумф, во спротивно ќе се вклучи црвениот аларм, а пак Струга максимално мотивирана и подготвена доаѓа во СРЦ „25 Мај“.
Ракометарот на Струга, Филип Талевски во изјава за Спортска Мрежа истакна дека неговиот тим е максимално подготвен за утрешниот меч, во кој гледаат само триумф.
„Имаме тешко гостување во Радовиш, но ќе влеземе во натпреварот максимално подготвени и самоуверени. Од ден во ден растеме како екипа, квалитетно тренираме и се подготвуваме за секој натпревар, кој ни е мотив плус. Бодовите од овој натпревар се многу значајни за нас и иако знаеме дека е тешко да се игра во Радовиш, ние ќе го одиграме планираното и одиме на победа“, рече Филип Талевски во изјава за Спортска Мрежа.
Талевски пред преселбата во тимот на Струга, го носеше дресот на Радовиш, па тој утре всушност ќе настапи против својот поранешен клуб.
„Ќе биде предизвик да се игра против поранешната екипа. Бев дел од Радовиш две години и знам што значи да се игра на тој терен, но како што кажав ние се подготвуваме и максимално мотивирани да одиграме и гледаме само кон победа“, ни изјави Талевски.
Натпреварот меѓу Радовиш и Струга се игра во СРЦ „25 Мај“ со почеток од 18 часот. Судиска двојка на мечот ќе биде Александар Вукашиновски и Мирко Трајковски од Скопје, а пак делегат на натпреварот ќе биде Васил Чавдаров од Богданци.
