Денес беа одиграни првите полуфинални натпревари од Купот на Македонија, каде екипата на Вардар со сериозна предност од 3:0 патува на реваншот во Струмица, откако триумфираше убедливо против Брера на Националната арена „Тодор Проески“ во Скопје.
Вардар резултатот го отвори во 26. минута кога Фаустин Сегнор ја стресе мрежата на гостинот од Струмица за 1:0, а на што протестираа фудбалерите на Брера за офсајд позиција, но голот не беше поништен.
Во финишот на првиот дел Мислав Матиќ постигна гол за 2:0 по првите 45 минути. Во второто полувреме Горан Закариќ постигна гол за конечни 3:0 со што Вардар веќе со една нога е во финалето.
Во Тетово беше многу понеизвесно каде Струга Трим Лум со 1:2 преку пресврт ја доби Шкендија, со што стружани со предност патуваат во реваншот кој сега ќе се игра покрај Охридското Езеро.
Флорент Рамадани во 36. минута постигна гол за 1:0 на полувреме. Во вториот дел Укпа погоди во 53. минута за 1:1, а пак во 82. минута Радески ги постави конечните 1:2 за триумф на Струга Трим Лум.
Реванш натпреварите се закажани за 23 април со почеток од 16 часот.
