Тиверија Брера со 48 гола го има најефикасниот напад во лигата, а шампионот Скопје со само осум примени гола ја има најдобрата одбрана. В недела, на 8 ноември од 13 часот, двете екипи ќе се сретнат во Скопје со три бода разлика на табелата. Домаќинките се втори со 25 бода, а струмичанки се трети со 22.
Скопје ја доби првата меѓусебна пресметка со 0:3 во Струмица, но во неделното дерби влегува по поразот од Љуботен со 3:2. Тиверија Брера, пак, во минатото коло загуби дома од Каменица Саса со 0:1. Со победа во Скопје, струмичанки би се израмниле со тимот од Пржино на 25 бода. Победа на домаќинките би ја зголемила разликата меѓу нив на шест.
Љуботен ќе го знае исходот од поголемиот дел од дербито кога во 14 часот ќе го почне гостувањето кај Кочани. Непоразениот лидер има 29 бода, а со победа би стигнал до 32. Повеќе од јасно е дека Љуботен ќе победи против „фенерџијата“ прашање е само со колкава разлика. Во тој случај, предноста на врвот би изнесувала четири бода ако победи Скопје, шест при реми и седум ако слави Тиверија Брера.
Колото го отвора Каменица Саса в сабота од 13 часот против Речица. Со победа би стигнала до 22 бода и привремено би се израмнила со Тиверија Брера. Пелистер, кој има 20 бода, в недела од 13:30 го пречекува Вардар и со триумф би го надминал сегашниот учинок на струмичанки. Во последниот неделен термин, од 14 часот, Ас Јунајтед го пречекува Истатов во Струга.
