Градското дерби во Струмица меѓу Брера и Беласица заврши без голови (0:0), па двата тима мораа да се задоволат со по еден бод во дуелот со кој беше комплетирано осмото коло во Втората македонска фудбалска лига.
За Беласица ова беше шесто последователно реми во првенството, а новиот тренер Раде Цицмиловиќ дебитираше на клупата на Беласица токму на градското дерби против Брера, ланскиот прволигаш.
Бодот има посебна тежина за Брера, која поголемиот дел од завршницата го одигра со играч помалку. Давид Ристовски беше исклучен поради два жолти картони, но неговите соиграчи успеаја да ја сочуваат својата мрежа и да стигнат до реми и покрај бројчената инфериорност.
Двете екипи имаа свои можности за погодок на стадионот „Благој Истатов“, каде што натпреварот се одигра под рефлектори и во атмосфера достојна за градско дерби. Сепак, ниту една од нив не успеа да ја искористи шансата за да го реши дуелот во своја корист.
Со поделбата на бодовите, Брера и Беласица го затворија осмото коло на ВМФЛ, а во следната рунда ќе имаат нова можност да се обидат да стигнат до посакуваната победа.
