Ракометарите на Бутел Скопје пропуштија можност за позитивен резултат на гостувањето кај Горица, откако по драматична завршница загубија со 27-24 во првиот дуел од второто коло во ЕХФ Европскиот Куп. Скопјани имаа предност од два гола во последните десетина минути, но домашниот состав со серија од 6-1 направи пресврт и си обезбеди предност пред реваншот.
Иако на почетокот Бутел се соочи со негатива од пет погодоци, избраниците на Стојанче Стоилов постепено се вратија во натпреварот. Подобрата одбрана и интервенциите на голманот Чаневски им помогнаа да го преземат водството во второто полувреме, а во еден момент поведоа и со 23-21. Сепак, неискористените напади во клучните моменти им овозможија на Хрватите да ја преземат контролата и да стигнат до конечните 27-24.
Во нападот на Бутел, Николоски, Субашевски и Стаменковиќ постигнаа по четири гола, додека кај Горица најефикасен беше Цековиќ со пет погодоци.
Одлуката за патникот во следното коло ќе падне во Скопје. Реваншот е закажан за 24 октомври од 17:00 часот, кога Бутел ќе има можност пред домашната публика да ја надомести негативата од три гола.
