Репрезентативната пауза ќе биде искористена за одржување на натпреварувачкиот ритам, но и за проверка на формата пред продолжението на сезоната во Втората македонска фудбалска лига.
Утре на Градскиот стадион во Радовиш ќе се сретнат два второлигаши – Детонит Плачковица и Беласица, во пријателски натпревар кој ќе биде добра можност за двата стручни штаба да ги проверат своите екипи и да ги одржат играчите во потребниот ритам.
Интересно е што и Детонит Плачковица и Беласица во последниот период не успеваат да дојдат до резултати какви што посакуваат. Радовишани се во нешто потешка серија, со три последователни порази во шампионатот. Детонит Плачковица загуби на гостувањата кај Новаци и Камјани, а потоа претрпе пораз и на домашен терен од Охрид.
Беласица, пак, има четири натпревари во низа без триумф. Иако серијата не е толку негативна како кај Детонит Плачковица, струмичкиот тим ќе се обиде токму преку овој контролен натпревар да ја подигне формата и подготвен да го дочека продолжението на шампионатот.
По репрезентативната пауза следува седмото коло во Втората лига. Детонит Плачковица ќе има домашен предизвик против Кожуф, во натпревар кој може да биде од големо значење во обидот радовишани да стават крај на негативната серија.
Беласица, од друга страна, ја очекува дерби-пресметка на домашен терен против Пелистер. Токму затоа контролниот дуел во Радовиш ќе биде можност и за струмичани да влезат во вистински ритам пред продолжението на првенствените обврски.
