КМФ Црна Река ги започна подготовките за новата сезона во Втората футсал лига на Македонија со јасно поставена цел – враќање во Првата лига.
Кавадаречкиот клуб, кој во минатото беше дел од најсилното футсал друштво, во новата сезона влегува со големи амбиции и се очекува да биде меѓу главните фаворити за пласман во Првата лига. Од клубот се децидни дека сè освен остварување на целта би било неуспех.
За разлика од минатото, кога составите често претрпуваат поголеми промени, Црна Река успеа да го задржи целиот ростер од минатата сезона. Во екипата има комбинација од искусни футсалери, млади и перспективни играчи, но и добро познати имиња кои со своето искуство треба да бидат носители на тимот.
Покрај задржувањето на постоечкиот состав, клубот работеше и на дополнително засилување на екипата. Во Црна Река пристигнаа четири нови имиња.
Од Кеги Моби од Велес доаѓа искусниот футсал играч Александар Михајлов, како и голманот Мартин Трпков, кој исто така има значително искуство и квалитет.
На голманската позиција ново име е и Тихомир Костов, млад и перспективен чувар на мрежата кој пристигнува од КМФ Клими.
Најзвучното име меѓу новите засилувања е Даниел Миловановиќ, искусен фудбалер добро познат на македонската спортска јавност. Миловановиќ доаѓа од големиот фудбал, а до пред само неколку месеци беше член на прволигашот Тиквеш од Кавадарци.
Така, Црна Река во новата сезона ќе се потпре на комбинација од традиција, искуство, младост и амбиција, со желба повторно да биде дел од најсилната македонска футсал конкуренција.
Новата сезона во Втората футсал лига ќе започне наскоро, а Црна Река ќе биде слободна во првото коло. Својата сезона кавадарчани ќе ја започнат во второто коло, кога на домашен терен во Кавадарци ќе го пречекаат Фудбал Старс од Кочани.
Со стабилен состав, четири нови засилувања и јасно поставена цел, поранешниот прволигаш тргнува во битка за враќање во елитата.
