По гостинската победа над Бутел Скопје, ГРК Охрид продолжува со обврските во Супер лигата, а следен предизвик за охриѓани е домашниот дуел со Прилеп. Натпреварот од четвртото коло ќе се одигра в петок од 19:45 часот во СРЦ „Билјанини Извори“.
Охрид во пресрет на мечот влегува со јасна цел да ја продолжи победничката серија и пред својата публика да стигне до нови два бода. Голманот Дино Славиќ очекува натпревар во кој домашниот состав мора максимално да биде концентриран на сопствената игра и пристап, без оглед на противникот.
„Нè очекува еден предизвикувачки натпревар, но мислам дека фокусот треба да ни биде на нас самите и нашата игра. Ако влеземе во мечот со 100% мислам дека победата не треба да биде доведена во прашање, ќе ја продолжиме победничката низа и ќе запишеме нови два бода.“- вели Славиќ.
Охриѓани ќе имаат можност пред домашната публика да го потврдат добриот старт и со уште еден триумф да продолжат во позитивен ритам. Против Прилеп, тимот на Борис Ројевиќ ќе се обиде да ја оправда фаворитската улога и да остане на победничкиот пат.
Охрид – Прилеп се игра в петок од 19:45 часот во СРЦ „Билјанини Извори“.
