Ланскиот прволигаш Шкупи продолжува со црната серија и во Втората македонска фудбалска лига. Чаирчани имаа лош старт во второлигашката конкуренција, откако во првото коло на домашен терен загубија со 0:2 од Детонит Плачковица од Радовиш.
За Шкупи ова е продолжение на серијата негативни резултати која трае уште од минатата сезона. Во Првата македонска фудбалска лига тимот од Чаир имаше само едно реми, додека забележа дури 32 порази, што резултираше со испаѓање од елитното друштво.
Она што дополнително го прави периодот тежок за чаирчани е фактот дека Шкупи последен пат славел на 10 септември 2025 година. Тогаш, во рамките на Купот на Македонија, Шкупи оствари минимална победа од 0:1 на гостувањето кај Кожуф во Гевгелија.
Оттогаш до денес, 21 август 2026 година, поминаа 345 дена, односно повеќе од 11 месеци без победа.
А токму против Кожуф Шкупи ќе има можност да стави крај на оваа неверојатна серија.
Чаирчани во второто коло од Втората лига повторно ќе патуваат во Гевгелија, каде ќе се обидат да стигнат до првата победа во новата сезона. Интересно, последниот триумф на Шкупи воопшто беше токму против Кожуф.
Дали Шкупи конечно ќе стави крај на црната серија и по речиси една година повторно ќе ги израдува своите навивачи? Или Кожуф ќе успее да му зададе нов удар на тимот од Чаир?
Шкупи ќе има мотив повеќе, но и сериозен притисок да покаже реакција по домашниот пораз од Детонит Плачковица.
Натпреварот Кожуф – Шкупи ќе се одигра в сабота, 22 август, од 16:30 часот на Градскиот стадион во Гевгелија.
