Кошаркарскиот клуб Соколи ги промовираше двете странски засилувања Кам Хамилтон и Џеј Пал, кој во сезона 2026/2027 ќе го носат дресот на амбициозниот клуб од градот под Исарот.
Кам Хамилтон, доаѓа од Шарлот, Северна Каролина, со себе носи големо меѓународно искуство стекнато покрај во САД и во Албанија, Кипар и Полска.
Ланската сезона 2025/2026 Хамилтон настапуваше во полскиот шампионат каде имаше блескава статистика со 19,9 поени, 5,7 скока, 3,8 асистенции и 2,5 украдени топки по меч, што е потврда дека се работи за големо засилување кое го добива Соколи.
Пал е крилен играч кој е висок 206 сантиметри, зад себе има богато NCAA искуство настапувајќи за Jacksonville State, Campbell и реномираниот San Diego State. Во кариерата настапуваше и во Грузија, Белгија и Мексико, а во сезона 2025/2026 за Frayles de Guasave бележеше просек од 13,2 поени и 5,5 скока.
Каков квалитет носи најдобро покажува неговиот моќен дабл-дабл учинок од 28 поени и 11 скока, надополнет со перфектни 5/5 погодоци за три поени!
Инаку, кошаркарите предводени од Марјан Србиновски вчера ги започнаа подготовките во салата „Јордан Мијалков“ во Штип, а од 9 септември ќе се преселат со работа во новата сала „Џексон“ која има капацитет од 1.300 гледачи.
