Новиот тренер на Пелистер, Тане Спасев, ги сподели своите очекувања пред почетокот на новата сезона, истакнувајќи дека битолскиот клуб има големо реноме во македонската кошарка.
„Пелистер е клуб со реноме. Уште од моите младински денови брендот значеше многу во македонската кошарка. Битола е еден од најубавите градови во Македонија и овој проект веднаш ми се допадна. Акцентот ќе биде ставен на младите македонски кошаркари, со само тројца странци. Верувам дека ќе имаме добра средина за работа, млада енергија и се надевам дека ќе играме убава кошарка за публиката“, изјави Спасев.
Тренерот откри и дека Пелистер во подготвителниот период ќе одигра неколку контролни натпревари против македонски екипи.
„Ќе играме пријателски натпревари само со македонски екипи, а првиот веќе е закажан за 4 септември. Ќе настапиме и на меморијалниот турнир во Битола. Горе-долу ќе имаме можност да се тестираме против речиси сите екипи од лигата“, додаде Спасев.
