Судиската организација при Одбојкарската федерација на Македонија започна со подготовките за новата натпреварувачка сезона 2026/2027, а во рамките на активностите го најави и Редовниот годишен семинар за судии и делегати.
Семинарот ќе се одржи на 3 и 4 октомври во хотелот „Романтик“ во Велес и е задолжителен за сите активни судии и делегати.
Главната цел е унапредување на стручната подготвеност, усогласување со актуелните одбојкарски правила, размена на искуства, како и спроведување на задолжителното тестирање за активните судии и делегати.
Деталната агенда, имињата на предавачите и програмата ќе бидат дополнително објавени, а се очекува семинарот да опфати повеќе стручни предавања на различни теми.
Во пресрет на семинарот, Судиската организација, следејќи ја позитивната практика од минатата година, упатува и отворен повик до сите заинтересирани лица кои имаат желба и интерес да започнат судиска кариера.
Целта е проширување и унапредување на судиските капацитети, вклучување на млади судии и обезбедување континуиран и квалитетен развој на Судиската организација при ОФМ.
