Вардар со убедлива победа го започна настапот на меморијалниот турнир „Крсте Андоновски“, совладувајќи го Олимпијакос со 39-27 во меч во кој разликата беше направена уште во првото полувреме.
По почетните 3-3, македонскиот шампион влезе во серија од девет погодоци и стигна до убедливи 12-3. Одбраната функционираше одлично, а Валах со неколку интервенции дополнително ја олесни работата на својот тим. До одморот Вардар веќе имаше двоцифрена предност (22-11), додека Олимпијакос остана и со играч помалку по исклучувањето на Папазоглу.
Во продолжението, Иван Чупиќ ја распредели минутажата и им даде шанса на помладите ракометари. Вардар без проблем ја контролираше играта, во завршницата стигна и до плус 13, па убедливо го приведе мечот до крај за стартна победа на турнирот.
