ГРК Охрид со победа го започна настапот на меморијалниот турнир „Крсте Андоновски – Охрид 2026“, откако бранителот на трофејот славеше над У-20 репрезентацијата на Египет со 31-27.
Охриѓани уште од самиот почеток ја презедоа контролата над натпреварот и со одлична игра во одбраната стигнаа до предност од 4-1. Во продолжението домашниот состав одржуваше предност од неколку гола, но пропуштените можности за дополнително зголемување на разликата му овозможија на Египет да остане во игра.
Младите „фараони“ во еден период успеаја да ја намалат негативата, откако Охрид направи неколку последователни грешки во нападот. Сепак, избраниците на Борис Ројевиќ реагираа навреме и на паузата заминаа со предност од 15-12.
Во второто полувреме Ројевиќ продолжи со ротациите и им даде минутажа на сите ракометари. Египет во еден момент успеа да се доближи на само еден гол негатива, но Охрид повторно ја воспостави контролата и во завршницата го реши прашањето околу победникот.
Кеита беше најрасположен во нападот со седум погодоци и беше прогласен за МВП на натпреварот, додека Лиапис постигна шест гола. Блажески запиша пет одбрани, а Ѓорѓески имаше значаен придонес во одбраната во почетната фаза од натпреварот.
За Охрид ова беше и натпревар во кој требаше да се распоредат силите, со оглед на густиот распоред и предизвиците кои следуваат.
Утре охриѓани ги очекува нов предизвик на турнирот „Крсте Андоновски“ против Војводина. Овој натпревар воедно ќе се бодува и во рамките на новоформираната Регионална лига.
