Селекторот на женската репрезентација на Македонија до 20 години, Деан Стојанов, ги одреди 14-те кошаркарки кои ќе настапат на БВА зонските квалификации за пласман на Европското првенство 2027. Турнирот од 19 до 23 август ќе се одржи во Мостар, Босна и Херцеговина.
По тринеделните подготовки, како и трите контролни натпревари со А-селекцијата, селекторот и стручниот штаб го направија конечниот избор на играчките кои ќе ја претставуваат Македонија на овој турнир.
Оваа генерација ја очекува голема шанса да испише историски успех, а избраничките на Стојанов со максимална мотивација влегуваат во квалификациските предизвици во Мостар.
Делегацијата вечерва со автобус патува за Мостар, утре попладне треба да одработи официјален тренинг, додека натпреваувачкиот дел стартува в среда.
Сите натпревари ќе се играат во спортската сала „Бијели бријег“ во Мостар, Македонија е дел од групата А, а турнирот го отвора на 19 август, на пладне, кога ќе се соочи со Романија. Ден подоцна, во второто коло од 14:30 часот игра со Белорусија, додека групната фаза девојките ја заокружуваат на 21 август, кога од 19:30 часот играат со домаќинот БиХ. Во групата Б се репрезентациите на Србија, Бугарија, Русија и Турција.
На 22 и 23 август ќе се играат натпреварите за пласман. ЦЕВ се уште нема точно дефинирано колку селекции од овој турнир ќе продолжат во следната квалификациска рунда, која треба да се игра од 21 до 24 јануари следната година.
