Битолскиот голман Кристијан Костадиновски се враќа во најквалитетното домашно ракометно натпреварување, откако по една сезона во Првата лига повторно ќе брани во Суперлигата.
Костадиновски е дел од новиот амбициозен проект на Струга, каде што веќе настапи на трите натпревари на традиционалниот Струшки турнир. Официјализацијата на соработката меѓу голманот и клубот се очекува во наредните денови.
Младиот чувар на мрежата минатата сезона ја мина во составот на Младост Богданци, каде што одигра значајна улога во враќањето на екипата во Суперлигата. Со своите настапи беше меѓу позаслужните за успешниот кам-бек на богданчани во елитното друштво.
Во кариерата Костадиновски има и суперлигашко искуство со Радовиш, каде што настапуваше во Првата и Суперлигата, додека претходно го бранеше и голот на својот матичен клуб Еурофарм Пелистер.
Со неговото доаѓање, Струга дополнително ја засилува конкуренцијата меѓу стативите. Во ростерот веќе се наоѓа уште еден голман од Битола, искусниот Мартин Јовановски, кој исто така е меѓу новите засилувања, како и Дамјан Тутенкоски.
Така, Струга во новата сезона ќе има тројца квалитетни голмани, што му дава дополнителни опции на стручниот штаб и уште еден показател за амбициите на клубот во пресрет на новата суперлигашка сезона.
