Селекторот на македонската репрезентација до 16 години, Дејан Стојановски, по последниот натпревар на Европското првенство и поразот од Бугарија во мечот за 13. место, го анализираше настапот на своите избраници. Тој ги посочи причините за послабото издание во последниот натпревар, но и нагласи дека младите кошаркари во периодот што следува ги очекува сериозна работа со цел да продолжат да се развиваат и напредуваат.
„Денеска не бевме спремни за борба, а направивме и многу тактички грешки. Не се држевме до гејм-планот, во многу моменти бевме недисциплинирани, а тоа на ова ниво не смее да се случи. Повторно имавме многу грешки и не е добро вака да се презентираме“, вели Стојановски.
Сепак, селекторот смета дека целокупната слика од настапот на првенството е реална, особено ако се земат предвид ограничувањата со кои се соочуваше тимот.
„Мислам дека оваа слика е реална. Ние во групната фаза игравме на максимум. Имавме и лоши моменти, тоа е нормално, но немаме длабока клупа која може да ги компензира тие работи.“
Македонија го завршува настапот на Европското првенство во Дивизијата „Б“ на 14. место, по вчерашниот пораз од Бугарија.
