Второлигашот Кожуф од Гевгелија го ангажираше Дарко Крстески за нов шеф на стручниот штаб, ексклузивно дознава Спортска Мрежа.
Искусниот 54-годишен стратег доаѓа на местото на Иван Варадиновски, кој минатата сезона го предводеше тимот од Гевгелија.
Интересно е што дојде до своевидна „тренерска размена“ меѓу двата второлигаши.
Варадиновски по заминувањето од Кожуф ја презеде екипата на Новаци, додека Крстески по разделбата со Новаци се сели на клупата на Кожуф, па практично двајцата тренери ги заменија своите клубови.
Крстески зад себе остава успешен тригодишен мандат во Новаци, каде беше еден од најзаслужните за стабилизацијата и резултатскиот напредок на клубот. Минатата сезона Новаци ја заврши на седмото место во Втората македонска фудбалска лига, што претставуваше еден од најдобрите пласмани на клубот во последната деценија.
Особено значајно е што Крстески остана со Новаци и во периодот кога клубот се соочуваше со финансиски предизвици. По влезот на компаниите Евротип и Голд Филиција, клубот се консолидираше, а токму под негово водство Новаци се наметна како едно од најпријатните изненадувања во второлигашката конкуренција.
Во својата богата тренерска кариера, Крстески ги предводеше Победа, со која избори пласман во Првата македонска фудбалска лига, како и Пелистер, Караорман, Новаци, а сега пред него е нов предизвик на клупата на Кожуф.
Искусниот стратег поседува УЕФА Про лиценца и од него во Гевгелија очекуваат да формира конкурентен тим кој ќе има високи амбиции во новата сезона.
