Освојувачот на Купот на Македонија, Силекс денес го пречекува „разнишаниот“ Башкими од Куманово на стартот од новата сезона.
Кратовци ќе ја имаат улогата на фаворит на овој меч и ќе целат кон трите бодови, а со тоа да се започне сезоната на најдобар можен начин. Силекс и годинава ќе биде претендент да се вмеша сериозно во трката за титулата, а во Купот на Македонија ќе има за цел да ја одбрани Куп титулата.
Прволигашот од Кратово под водство на стратегот Александар Васоски беше блиску до пласман во второто квалификациско коло во Конференциската лига, откако на гости го доби Динамо Минск со минимални 0:1, во Скопје во регуларниот дел беше 0:1 за гостинот од Белорусија, а потоа во пенал-серијата Силекс беше поразен и сега останува фокусиран на предизвиците во шампионатот.
Од друга страна Башкими влегува целосно ремонтиран и со млади сили во новата сезона, што ќе биде под нивото од минатата сезона кога зборуваме за квалитет во ростерот, па тоа ќе биде повеќе од сериозен предизвик да се остварат целите – опстанок во елитата.
Предводник на Башкими ќе биде Гајер Реџепи, а негов помошник Бесим Мустафи.
Натпреварот во Кратово започнува во 17 часот.
