РК Бутел Скопје продолжува да го задржува препознатливото клупско јадро, а најновата потврда за тоа е продолжувањето на соработката со искусното десно крило Бојан Спасовски.
Спасовски стави потпис на нов двегодишен договор, со што ќе остане во Бутел Скопје најмалку до летото 2028 година.
По три сезони минати во тимот на Аеродром, во периодот кога клубот настапуваше во Првата лига, тој во 2020 година се врати во матичниот клуб.
„Еден од ракометарите со најдолг стаж во Бутел Скопје, Бојан Спасовски, ја продолжи соработката со клубот. Десното крило потпиша нов договор на две сезони и ќе остане во нашиот клуб најмалку до летото 2028 година“, соопштија од Бутел Скопје.
Минатата сезона Бутел Скопје го заврши шампионатот на петтото место во плеј-офот од Супер лигата, а во новата натпреварувачка година клубот влегува со нова енергија и со Стојанче Стоилов на тренерската позиција.
Досега, раководството на Бутел Скопје ги потврди и ангажманите на голманите Градимир Чаневски и Марко Богдановски, со што јасно ги најави амбициите за претстојната сезона.
