Освојувачот на Купот на Македонија, Силекс, продолжува со засилувањата во пресрет на новата натпреварувачка сезона, а најново име во редовите на кратовци е младиот македонски репрезентативец Никола Манојлов.
Талентираниот крилен напаѓач доаѓа од Работнички, клуб во кој ги направи своите први сениорски чекори и успеа да се наметне како еден од најперспективните млади фудбалери во македонскиот фудбал. По испаѓањето на „романтичарите“ во Втората македонска фудбалска лига, Манојлов се реши за нов предизвик и кариерата ќе ја продолжи во Кратово.
Во Силекс веруваат дека младинскиот репрезентативец ќе донесе дополнителна брзина, креативност и продорност во офанзивниот дел од тимот, а неговото доаѓање е уште една потврда за амбициите на кратовскиот состав во новата сезона.
Силекс ова лето значително го освежи играчкиот кадар, а претходно клубот ги претстави и Дарко Илиески, Борјан Пановски, како и неколку интернационалци од Србија и Босна и Херцеговина.
Тимот предводен од Александар Васоски во моментов ги одработува подготовките во Охрид, каде веќе го одигра и првиот контролен натпревар. Кратовци беа поразени од албанскиот Динамо Тирана со 1:2, но стручниот штаб продолжува со темпирање на формата за европските предизвици.
Силекс, кој минатата сезона го освои Купот на Македонија, наскоро го очекува и настап во квалификациите за Конференциската лига на УЕФА, каде во првото квалификациско коло ќе се соочи со белорускиот претставник Динамо Минск. Со ангажманот на Никола Манојлов, кратовци дополнително ја засилуваат конкуренцијата во нападот во пресрет на важните предизвици на домашната и европската сцена.
