Второлигашот Беласица го назначи Мартин Алаѓозовски за нов шеф на стручниот штаб на сениорската екипа.
Алаѓозовски важи за еден од најперспективните млади тренери во македонскиот фудбал. Својата тренерска кариера ја градеше во младинските категории на АП Брера Струмица, каде што постигна значајни резултати, освојувајќи повеќе шампионски титули и Куп-трофеи со младинските селекции на клубот.
Минатата сезона го направи и својот дебитантски чекор во сениорскиот фудбал, откако беше назначен за шеф на стручниот штаб на Брера Струмица во Првата македонска фудбалска лига. Со тоа стекна драгоцено искуство во работата со прволигашка екипа и во водењето натпревари на највисоко домашно ниво.
Покрај клупските обврски, Алаѓозовски е активно вклучен и во работата на младинските репрезентации на Македонија, каде што ја извршува функцијата помошен тренер.
Во досегашната кариера изгради репутација на тренер кој успешно ги развива младите таленти и преферира динамичен и офанзивен фудбал.
Со неговото доаѓање, Беласица добива амбициозен стратег кој ќе има задача да го продолжи развојот на клубот и да изгради конкурентен тим за претстојните предизвици.
