Организаторот на 51. издание на традиционалниот турнир во мал фудбал „Петровден“ во Мешеишта информираше дека екипата на „Компанија Атанасовски“ се повлекла од понатамошното натпреварување.
Според информациите од организаторот, екипата поради непланирани обврски донела одлука пријателски да го напушти турнирот. Од организацискиот одбор им посакаа многу успех и изразија надеж дека следната година повторно ќе бидат дел од турнирот во Мешеишта.
Бидејќи „Компанија Атанасовски“ требаше денес да ги одигра своите натпревари, согласно пропозициите на турнирот, сите средби ќе бидат регистрирани со службен резултат во корист на противничките екипи.
Поради новонастанатата ситуација, организаторот донесе одлука денешниот ден да биде слободен, односно нема да се играат натпревари на турнирот.
„Искористете ја оваа слободна вечер за мал одмор, а веќе од утре продолжуваме со истото силно темпо и одличен мал фудбал“, порачуваат организаторите.
Спортска Мрежа и годинава е медиумски покровител на овој спортски настан.
